මගේ ආදර උප දිසාපති හැඳින ගන්නට බැරි උනා

0
145
fake-love

ජනපදේ අක්කර දෙකේ හිමි සහතිකේ මගේ නැති වුනා

ලේඛනේ පිටපතක් ගන්නට ඔෆීසිය ළඟ නැවතුනා

සිප්හලේ සිට බිඳුනු සෙනෙහස ඉහළ අසුනේ වැජඹුනා

ඔප්පුවේ පිටපතේ අත්සන හැඳින ගන්නට බැරි උනා

හිත් බිඳී ඔබ මගෙන් දුර ගොස් දොළොස් වසරක් පහු උනා

සිප් නැවේ ගොස් සප්ත සයුරේ ඈත දියඹේ නොපෙනුනා

එගොඩ වන්නට නොහැකිවූ මා කටුරොදේ දුක පැටලුනා

ලියමනේ නැති වුන සෙනේ ළඟ කැලෑ මල් පෙති විසිරුනා

උපැස් යුවළට යටින් දෙනෙතේ බැරෑරුම් බව මතු වුනා

තෙජස් බව රැඳි නිවන ජන දුක පෝලිමේ හිඳ දිස්වු නා

දං පඳුර යට දිනක් ඇවිලුනු පිරුණු නෙත් යුග සිහිවුනා

මගේ ආදර උප දිසාපති හැඳින ගන්නට බැරිඋනා

බලා සිටියා ඉඳිකඩට වී එන තුරා නුඹ පෙර දිනේ

මිරිගු දිය ඈතටම ඇදුනා මගේ හිත ඔහු ගත් දිනේ

ගලා ගිය හැටි සෙනේ දියවර තුරු ලතා සිප පෙර දිනේ

එදා සිඳුනා වියළි කතරේ පිටගමට ගිය මගෙ සෙනේ

වියලි කතරේ නිසරු පොලොවේ මහමෙරක දුක ඉහිලුනා

නියං සායේ දැවුනු හේනේ කඳුළු පොකුරෙන් පීදුනා

පියළි අතරේ නැගෙන අංකුර සොයා සිත් මල වෙහෙසුනා

පුරං කුඹුරේ කොහෙද අස්වනු කියා හදවත බර වුනා

දුකට හුරු වුන අහස් කුස ඇති සරා සඳ තනියටම උන්නා

ගෙපැල වහළේ විසුළ සිදුරෙන් කළාලේ දුක ළඟට ගන්නා

මතක මහළට ඇවිත් දවසක් ඔබේ පෙර සිත බලා උන්නා

නෙතට වැහි කැට වැටී සිරවුනු ඉවුරු සිඳ බිඳ දරා උන්නා

අරුමයකි පෙර දවස මහ රෑ මගේ ළමැදේ වැතිර උන්නේ

සිහිනයකි සුව පවස නිවමින් රහසේ නුඹ මා ළඟම උන්නේ

කරුමයකි විෂ බමර තුඩගින් සිහින එළි කර දුරට යන්නේ

පුදුමයකි පෙර බැඳුනු හදවත් හමුවෙලාවත් නොදැක ඉන්නේ

පවර තෙදබල වොරඳ මැති සඳ මගේ ඇහිපිය ළඟම දැකලා

එවර සවිබල බිඳී ආපසු හැරී ආපසු ගියෙමි හැරිලා

ගිලුනු දෑසග රැඳුනු පිනි මුතු දිය කලා සළුපටින් වසලා

සැලුනු හද දොර කවුළු වැසුවෙමි ඔහුගේ දෑසට වසන් කරලා

ස්වර්ණ කුමාර

මෙවැනි පුවත් ඉක්මනින්ම දැනගැනීම සඳහා අපගේ f.b පිටුව like කර තබා ගන්න.

LEAVE A REPLY

Please enter your comment!
Please enter your name here